اشتياق انصاري
اشتياق انصاري (انگريزي: Ishtiaq Ansari) سنڌ، پاڪستان سان تعلق رکندڙ سنڌي ٻولي جو محقق ۽ ڪهاڻيڪار آهي. سندس ڪيترائي ڪتاب ڇپيل آهن.[1]
زندگي ۽ تعليم[سنواريو]
اشتياق انصاري جو اصل نالو اشتياق احمد آهي. پاڻ سنڌي ٻوليءَ جي نامياري اديب انيس انصاريءَ جي گهر ۾ لاهوري محلي لاڙڪاڻي ۾ 30 جنوري 1952ع جنم ورتائين. شروعاتي تعليم قمبر شهر ۽ لاڙڪاڻي مان حاصل ڪيائين، بعد ۾ سنڌ يونيورسٽي ڄامشورو مان گريجوئيشن سان گڏ مهراڻ يونيورسٽيءَ مان سول انجنيئرنگ جي ڊگري حاصل ڪئي. شاگرديءَ واري زماني ۾ ڪرڪيٽ ۽ ٻين راندين سان دلچسپي هئس. سٺو ائٿليٽ بہ رهيو ۽ شاگرد سياست ۾ بہ بهرو ورتائين ۽ ڪجهہ عرصو جيل ۾ بہ رهيو. ايگزيڪيوٽو انجنيئر طور دادو ۾ بہ رهيو. هن وقت حسين آباد، حيدرآباد ۾ پنهنجي جيون ساٿي شبنم گل سان گڏ رهائش پذير آهي، جيڪا پڻ سنڌي زبان جي مشهور ڪهاڻيڪاره ۽ ڊرامہ نگار آهي.[1]
ادبي خدمتون[سنواريو]
سير سفر ۽ تحقيق سندس مشغلو رهيو آھي. مهم جوئيءَ واري سلسلي ۾ هن ساٿين سان گڏجي 1989ع ۾ ٻيڙين ذريعي درياھ ڪابل کان مهم شروع ڪئي، جيڪا عربي سمنڊ ۾ پورٽ قاسم وٽ ختم ڪئي وئي. انڊس ڊيلٽا بابت مهمن دوران ديبل بندر جي ڳولا بہ ڪيائين ۽ انکان سواءِ اڇڙي ٿر، لاهوت لامڪان ۽ کيرٿر جا تحقيقي سفر ڪيائين. هن سفرناما ۽ ڪهاڻيون بہ لکيون آهن. “دکم“ (ڪهاڻيون) اڻڇپيل ڪتاب آهي. کيس سنڌي ادبي سنگت ۽ سنڌي ايسوسيئيشن آف نارٿ آمريڪا طرفان اوارڊ پڻ مليا آهن. هن گهڻائي ملڪ گهميا آهن.[1]
ڪتاب[سنواريو]
سندس ڇپيل ڪتابن ۾:[1]
- سنڌ جا ڪوٽ ۽ قلعا (تحقيق)[2]
- خيما کاهوڙين (سفرنامو)،[3]
- اينٿراپالاجيڪل ناول ”اوڏ مٽيءَ جا ڪوڏ“
- ووڙيم سڀ وٿاڻ (سفرنامو)
- انيس انصاري فن ۽ شخصيت
- ”ڌرتي ماتا“ (تحقيق)
- ”جتي ماڻڪ ماڳ“ (تحقيقي مضمون)
- گورک تحقيق
اوارڊ[سنواريو]
اشتياق انصاري کي سنڌي ايسوسيئيشن آف نارٿ آمريڪا ۽ سنڌي ادبي سنگت طرفان ادبي خدمتن تي اوارڊ مليل آهن.[1]
حوالا[سنواريو]
- ↑ 1.0 1.1 1.2 1.3 1.4 "اشتياق انصاري : (Sindhianaسنڌيانا)". www.encyclopediasindhiana.org (ٻولي ۾ Sindhi). حاصل ڪيل 2019-06-12.
- ↑ "Sindh Ja Kot Ain Qila 2 Book Price in Pakistan-Homeshopping". Home Shopping Pakistan. حاصل ڪيل 2019-06-12.
- ↑ "::: Sindhica :::". sindhica.org. حاصل ڪيل 2019-06-12.