احمد خان مدهوش
| احمد خان مدهوش | |
|---|---|
| پيدائش | احمد خان سومرو اپريل 05 1931 ڳوٺ سلطان چانڊيو، دادو ضلعو، سنڌ، پاڪستان |
| وفات | 26 جون 2010 (عمر 79 سال) ڪراچي |
| ڌنڌو | شاعر |
| ٻولي | سنڌي |
| قوميت | پاڪستاني |
| تعليم | سنڌي فائينل |
| صنف | شاعري |
| مُکيه ڪم | دل جون ڳالهيون نظر ۾ نظر بند |
| ايوارڊ | ڪي ٽي اين بهترين شاعر اوارڊ |
احمد خان مدهوش (Ahmed Khan Madhosh؛ پيدائش:5 اپريل 1931ع، وفات:26 جون 2010ع) سنڌ جو مشهور شاعر جنهن جا ڪافي ڪتاب ڇپيل آهن.[1]
زندگي جو احوال
[سنواريو]ناميارو شاعر احمد خان ولد حاجي خان (حاجي فقير شغلي) ذات سومرو، 5 اپريل 1931ع تي دادو ضلعو جي خيرپور ناٿن شاه تعلقو جي ڳوٺ سلطان چانڊيي ۾ ڄائو، 1932ع ۾ سندس خاندان ’جوهي‘ شهر ۾ اچي آباد ٿيو. 1949ع ۾ سنڌي فائنل، 1957ع ۾ انٽر ۽ 1965ع ۾ اديب فاضل سنڌيءَ جا امتحان پاس ڪيائين.[2] ڳپل عرصو جوهيءَ ۾ استاد ٿي رهيو. سيد نجف علي شاھ سندس هم عصر شاعر هو. هن شاعريءَ جي سکيا فيض بخشاپوريءَ کان ورتي. . احمد خان اڳتي هلي شاعريءَ ۾ پنهنجو تخلص ”مدهوش“ رکيو، پاڻ سنڌ جو ڪهنه مشق سڄاڻ ۽ ناميارو شاعر هو. پاڻ استاد جهڙي مقدس پيشي سان لاڳاپيل هو. شاعري جي مڙني صنفن تي طبع آزمائيڪيائين، سندس ڪلام اخبارن، رسالن ۾ شايع ٿيندو رهي ٿو. سندس شاعري مختلف راڳين جي آواز ۾ ريڊيو تان پڻ نشر ٿيندي رهندي آهي.
ڪتاب
[سنواريو]سندس شاعريءَ جا ٽي مجموعا ’دل جون ڳالهيون‘[2] سنڌي ادبي بورڊ پاران 1993ع ۾، اکين جا سنيها سنڌي ادبي بورڊ پاران 2011ع ۾ [3] ۽ ”نظر ۾ نظربند“ سنڌيڪا اڪيڊميڪراچيءَ 2003ع ۾ ڇپائي پڌرا ڪيا. استاد شاعرن ۾ ڳڻيو وڃي ٿو. غزل ۽ نظم جو وڏو شاعر آهي. سنڌي ادبي بورڊ جي بورڊ آف گورنرس جو ميمبر هيو. احمد خان مدهوش 26 جون 2010 تي وفات ڪئي.[4]
شاعريءَ جو نمونو
[سنواريو]چوسٽا
- نہ لالن جي نه موتين جي، نہ هيرن جِي ڀري گُهرجي،
- نہ ڪا صندوق پئسن جِي ٿي هلڪِي يا ڳري گهرجي،
- نہ ڪي ”مدهوش“ کي ڪو ڪارخانو يا کري گهرجي،
- ڏسڻ ڏي سُونهن قدرت جِي، عنايت ايتري گهرجي.
- اگر گهرجي تہ تنھنجي نظر شفقت ڀري گُهرجي،
- اگر گهرجي تہ بس دلدار تنھنجي دلبري گهرجي،
- نہ دنيا ويڪري گُهرجي نہ جنّت جِي دري گهرجي،
- رڳو ”مدهوش“ کي بس قربَ تنھنجي جي ذري گهرجي.
- پُڇيم دل کان تہ ڇا اي دل چري گُهرجي،
- چيائين حُورَ گُهرجي ٿي نہ ڪا سُھڻِي پرِي گهرجي،
- نگاھ سروري گُهرجي، ۽ دست داوَري گهرجي،
- اگر ”مدهوش“ ڪجهہ گهرجي تہ پاڇو پَر وَري گهرجي.
وفات
[سنواريو]احمد خان مدهوش ڪينسر جي موذي مرض ۾ مبتلا ٿيو ۽ 26 جون 2010ع تي وفات ڪري ويو.