ٻٽو نظام

سنڌ پيپلز لوڪل گورنمينٽ آرڊيننس 2012ع (انگريزي: Sindh Peoples Local Government Ordinance 2012)، جيڪو عام طور سنڌ ۾ ٻٽي نظام طور مشهور ٿيو، 7 سيپٽمبر 2012ع تي پاڪستان پيپلز پارٽي پاران سنڌ ۾ لاڳو ڪيل هڪ آرڊيننس جو نالو هو، جنهن تحت سنڌ ۾ ٻه مختلف نظام لاڳو ڪيا ويا هئا. هن نظام تحت ڪراچي، حيدرآباد، سکر، ميرپورخاص، ۽ لاڙڪاڻي ۾ ميٽروپوليٽن ڪارپوريشنون قائم ڪيون ويون، سنڌ جي ٻين ضلعن ۾ ضلعي ڪائونسلون بحال رکيون ويون. هن نظام تحت ڪراچي جا پنج ضلعا ختم ڪري 18 ٽائون ۽178 يونين ڪائونسلن کي بحال ڪيون ويون.

پسمنظر

بينظير ڀٽو جي قتل کان پوءِ، پاڪستان پيپلز پارٽي سنڌ ۽ وفاق ۾ گڏيل حڪومت قائم ڪئي. 2 سيپٽمبر 2012ع تي پاڪستان جي تڏھوڪي صدر آصف علي زرداري اعلان ڪيو تہ عام چونڊن کان اڳ مقامي چونڊون ٿينديون ۽ سنڌ ۾ نئون مقامي نظام لاڳو ڪيو ويندو. نئين نظام لاءِ سنڌ حڪومت ۾ پ پ پ جي اتحادين، عوامي نشنل پارٽي، پاڪستان مسلم ليگ فنڪشنل، اين پي پي سان رابطن جو پڻ چيو.