حميد ابڙو

حميد ابڙو جو پورو نالو عبدالحميد ابڙو آهي. ھن 2 اپريل 1973ع تي ٺل تعلقي جي ڳوٺ حاجي شاهنواز ڏيئي ۾ علي محمد ابڙي جي گهر ۾ جنم ورتو. پرائمري تعليم ڳوٺ مان، مئٽرڪ گورنمينٽ هاءِ اسڪول ٽريننگ ڪاليج حيدرآباد مان، انٽر ۽ گريجوئيشن سچل سرمست ڪامرس ڪاليج حيدرآباد مان ۽ ايم اي اڪانامڪس سنڌ يونيورسٽيءَ مان ڪيائين. حميد ابڙي 1992ع کان اخبارن ۽ رسالن ۾ پروف ريڊر، ڪمپوزر ۽ سب ايڊيٽر طور ڪم شروع ڪيو جنھن دوران سندس ادب ڏانھن دلچسپي وڌي ۽ روزاني عبرت، خادم وطن، عبرت مئگزين، ماهوار هزار داستان، سنڌ رنگ ڊائجسٽ ۽ هفتيوار سنڌو ۾ سندس ڪھاڻيون ۽ مضمون ڇپجندا رهيا. حميد ابڙي ڪھاڻين ۾ سماجي قدرن، ديس واسين سان محبت ۽ غريب طبقي جي مسئلن کي اجاگر ڪيو آهي. کيس سندس ٽي وي ڊرامي ”درياھ جو درد“ تي 2004ع ۾ بھترين ڊراما رائيٽر جو اوارڊ ڏنو ويو. ان کانسواءِ 2009ع ۽ 2005ع ۾ انيس انصاري اڪيڊمي پاران سندس ڪھاڻي ”مٽي“ ۽ ”سُکا“ تي اوارڊ ڏنا ويا.