انڌو ھينئر
| انڌو هينئر | |
|---|---|
 | |
| انڌو هينئر | |
| سائنسي درجا بندي | |
| ڪنگڊم: | جانور |
| تقسم: | وترڌاري |
| درجو: | ريڙهيدار |
| ترتيب: | نانگ |
| خاندان: | پاڻيواتوڙا نانگ |
| نسل: | Enhydris |
| جنس: | Enhydris pakistanica |
| حياتياتي نالو | |
| Enhydris pakistanica | |
انڌو هينئر (Enhydris pakistanica) پاڻيواتوڙي نانگن (Homalopsidae) جي ڪٽنب سان تعلق رکندڙ پاڻيءَ ۾ رهندڙ نانگ جي هڪ جنس آهي، جيڪا پاڪستان، خاص طور سنڌ ۾ ملي ٿي.[1]
سڃاڻپ
[سنواريو]انڌو هينئر جي ناسون مٿي ۽ اڳئين پاسي هونديون آهن، جيڪي پاڻيءَ اندر ساهه کڻڻ لاءِ موافق بڻيل آهن. ناسن جي چوڌاري موجود والوَ پاڻي کي اندر داخل ٿيڻ کان روڪين ٿا. هن جو نڪ وارو ڇلر پوئين ڇلرن کان وڏو هوندو آهي، جڏهن ته پڇ جي آخري حصي تي چپٽائي هوندي آهي، جيڪا ترڻ ۾ مددگار ثابت ٿئي ٿي. هي نانگ مضبوط جسم وارو هوندو آهي، پر ان جي کل نسبتاً ڍري هوندي آهي. مٿو ننڍو هوندو آهي ۽ ڳچيءَ کان واضح طور جدا نظر نٿو اچي. ڇلر نرم، لسا ۽ چمڪدار هوندا آهن، جڏهن ته اکين جون پُتليون عمودي شڪل جون ٿين ٿيون. جسم تي ڇلرن جون 27 کان 30 قطارون هونديون آهن.[2]
جسامت
[سنواريو]انڌو هينئر عام طور 0.5 کان 0.6 ميٽر ڊگهو ٿيندو آهي، جڏهن ته ان جي پڇ جي ڊيگهه لڳ ڀڳ 70 کان 100 ملي ميٽر هوندي آهي. ڀارت ۾ هن جنس سان لاڳاپيل هڪ ويجهو قسم Enhydris enhydris ملي ٿو، جنهن جي وڌ ۾ وڌ ڊيگهه نر ۾ 0.90 ميٽر ۽ مادي ۾ 0.96 ميٽر رڪارڊ ڪئي وئي آهي.[3]
رهڻي ڪهڻي
[سنواريو]هي نانگ ڏينهن جو سرگرم رهندو آهي ۽ گهڻو وقت پاڻيءَ اندر گذاريندو آهي. عام طور آبي ٻوٽن ۾ لڪل رهندو آهي ۽ پاڻيءَ کان ٻاهر تمام گهٽ نڪرندو آهي. سياري جي موسم ۾ ڍنڍن جي ڪنارن تي موجود ڏرڙن يا سوراخن ۾ پناهه وٺندو آهي. زمين تي اچڻ جي صورت ۾ بيچيني محسوس ڪندو آهي ۽ ٻين ڪيترن نانگن جي ڀيٽ ۾ بار بار زبان ٻاهر نه ڪڍندو آهي. پڪڙجڻ تي عام طور چڪ نه هڻندو آهي.[4]
خوراڪ
[سنواريو]انڌو هينئر بنيادي طور مڇين ۽ ڏيڏرن تي گذارو ڪندو آهي.[5]
ورڇ
[سنواريو]هي نانگ سنڌ ۾ خاص طور لاڙ واري علائقي ۾ دريائن سان لاڳاپيل ڍنڍن، ڍورن، تلائن ۽ ٻين مٺي پاڻيءَ جي ذخيرن ۾ ملي ٿو.[6]
خطرا
[سنواريو]گرم ۽ خشڪ موسم دوران پاڻيءَ جي کوٽ سبب انڌو هينئر جي بقا کي خطرو درپيش ٿي سگهي ٿو، ڇاڪاڻتہ هي مڪمل طور آبي ماحول تي دارومدار رکي ٿو.[7]
حوالا
[سنواريو]- ↑ "Reptile Database: Enhydris pakistanica". The Reptile Database. 31 July 2026 تي حاصل ڪيل.
- ↑ "انڌو هينئر". سنڌيانا انسائيڪلوپيڊيا.
- ↑ Khan, M. S. (2006). Amphibians and Reptiles of Pakistan. Krieger Publishing Company. ISBN 978-1575240282.
- ↑ "انڌو هينئر". سنڌيانا انسائيڪلوپيڊيا.
- ↑ "انڌو هينئر". سنڌيانا انسائيڪلوپيڊيا.
- ↑ "انڌو هينئر". سنڌيانا انسائيڪلوپيڊيا.
- ↑ "انڌو هينئر". سنڌيانا انسائيڪلوپيڊيا.