نڪولا ٽيسلا

نڪولا ٽيسلا
نڪولا ٽيسلا
رھائش	آمريڪا، آسٽريا، هنگري
قوميت	سربيائي - آمريڪي
تعليم	گريز جي حرفتي ڪاليج (آسٽريا)

نڪولا ٽيسلا (Nikola Tesla؛ 1856ع - 1943ع) هڪ عظيم موجد، اليڪٽريڪل انجنيئر ۽ فزيڪس دان هو. هن جي سڀ کان اهم ايجاد رُخ بدلائيندڙ ڪرنٽ (Alternating Current) وارو نظام آهي، جنهن اڄ جي جديد دنيا کي روشن ڪيو آهي.

شروعاتي زندگي

نڪولا ٽيسلا 10 جولاء 1856ع تي هاڻوڪي ڪروشيا جي شهر سميلين (Smiljan) ۾ پيدا ٿيو. روايت آهي ته سندس پيدائش هڪ طوفاني رات ۾ ٿي، جنهن تي سندس ماءُ چيو هو ته ”هي اونداهيءَ جو نه پر روشنيءَ جو ٻار ٿيندو“. سندس پيءُ هڪ پادري هو پر ٽيسلا جي دلچسپي سائنس ۽ انجنيئرنگ ۾ هئي. هن آسٽريا جي شهر گريز مان تعليم حاصل ڪئي، جتي هو روزانو صبح جو 3 بجي کان رات جو 11 بجي تائين ڪم ڪندو هو. هو اٺ ٻوليون ڳالهائي سگهندو هو.

اهم ايجادون ۽ خدمتون

ٽيسلا پنهنجي زندگيءَ ۾ 300 کان وڌيڪ سندون (Patents) حاصل ڪيون. سندس ڪجهه نمايان ايجادون هي آهن:

رُخ بدلائيندڙ ڪرنٽ (AC System): هن بجليءَ جي فراهمي جو اهڙو نظام تيار ڪيو جيڪو وڌيڪ فاصلي تائين طاقت ضايع ڪرڻ کان سواءِ پهچي سگهي.
انڊڪشن موٽر: 1887ع ۾ هن بجليءَ جي چقمقيت سان هلندڙ موٽر ايجاد ڪئي.
ريموٽ ڪنٽرول: 1898ع ۾ هن پهريون ڀيرو ريموٽ ڪنٽرول ذريعي هڪ ٻيڙي هلائي ڏيکاري.
ٽيسلا ڪوائل: هي اوزار تمام گهڻي وولٽيج پيدا ڪرڻ جي صلاحيت رکي ٿو، جيڪو ريڊيو ٽيڪنالاجي ۾ بنيادي حيثيت رکي ٿو.

ايڊيسن سان اختلاف (بجليءَ جي جنگ)

ٽيسلا جڏهن آمريڪا ويو ته هن ٿامس ايڊيسن جي ڪمپني ۾ ڪم شروع ڪيو. ايڊيسن سڌي وھڪري واري ڪرنٽ (Direct Current) جو حامي هو، جڏهن ته ٽيسلا AC سسٽم کي بهتر سمجهندو هو. ان اختلاف سبب ٽيسلا اها نوڪري ڇڏي ڏني ۽ پنهنجي ڪمپني قائم ڪئي. اڳتي هلي جارج ويسٽنگ هائوس سان ملي هن ثابت ڪيو ته AC سسٽم ئي مستقبل جي ضرورت آهي.

آخري دور ۽ وفات

ٽيسلا هڪ عظيم سائنسدان هجڻ سان گڏ هڪ انتهائي نرم دل انسان هو. هن ويسٽنگ هائوس ڪمپني کي مالي بحران مان ڪڍڻ لاءِ پنهنجي رائلٽي جا ڪروڙين ڊالر معاف ڪري ڇڏيا. هو پنهنجي زندگيءَ جي آخري ڏينهن ۾ نيو يارڪر هوٽل جي ڪمري نمبر 3327 ۾ رهندو هو ۽ ڪبوترن کي داڻو کارائڻ جو شوقين هو.

7 جنوري 1943ع تي 86 سالن جي عمر ۾ هن دنيا مان لاڏاڻو ڪيو. سندس وفات وقت هو ڪنگال هو، پر سندس ايجادن پوري انسانيت جي زندگي بدلائي ڇڏي هئي.

پڻ ڏسو

حوالا