مواد ڏانھن هلو

مارسيلو ڪوسٽا

کليل ڄاڻ چيڪلي، وڪيپيڊيا مان


مارسيلو ڪوسٽا
AO
پيدائش9 جنوري 1940(1940-01-09)
تورين، اٽلي
وفات14 اپريل 2024(2024-04-14) (عمر 84 سال)
ايڊيليڊ، آسٽريليا
شھرت جو ڪارڻطب جي سائنسي بنياد
طبي پيشو
پيشونيوروفزيالاجي جو پروفيسر
شعبونيوروفزيالاجي
ادارو
کوجناآنڊن جي ڪارڪردگي کي ڪنٽرول ڪرڻ ۾ عصبي خلين جو ڪردار
ويب سائيٽ
flinders.edu.au/people/marcello.costa

مارسيلو ڪوسٽا [Marcello Costa ] (9 جنوري 1940ع – 14 اپريل 2024ع) اطالوي ڄائو آسٽريليائي طبي محقق، تعليمي ماهر ۽ عوامي صحت جو سرگرم حامي هو.

هن آنڊن جي عصبي نظام جي بناوت ۽ ڪارڪردگين ۾ خصوصي مهارت حاصل ڪئي. هن تورين، ميلبورن ۽ هيلسنڪي ۾ تدريس ڪئي، پوءِ 1975ع ۾ ايڊيليڊ منتقل ٿيو، جتي هو فلنڊرز ميڊيڪل اسڪول جو باني ليڪچرار بڻيو ۽ اداري ۾ نيوروسائنس جي نئين شعبي جي تعمير ۾ اهم ڪردار ادا ڪيائين.

هن فلنڊرز يونيورسٽي ۾ خدمتون سرانجام ڏنيون، جتي 2013ع کان 2021ع ۾ رٽائرمينٽ تائين هو فزيالاجي شعبي ۾ ميٿيو فلنڊرز امتيازي پروفيسر آف نيوروفزيالاجي جي عهدي تي فائز رهيو.

هو آسٽريليائي نيوروسائنس سوسائٽي، ڏکڻ آسٽريليائي نيوروسائنس انسٽيٽيوٽ (ساني) ۽ فرينڊز آف سائنس اِن ميڊيسن (ايف ايس ايم) جو گڏيل باني هو. کيس آسٽريليائي سينٽينري ميڊل ۽ فيڊريشن آف نيوروگيسٽروانٽرولوجي اينڊ موٽيلٽي سوسائٽيز پاران پهريون لائيف ٽائيم اچيومينٽ ايوارڊ ڏنو ويو، جڏهن ته 2020ع ۾ کيس آرڊر آف آسٽريليا جو آفيسر مقرر ڪيو ويو.

ابتدائي زندگي ۽ تعليم

[سنواريو]

ڪوسٽا 9 جنوري 1940ع تي تورين، اٽلي ۾ ڄائو.[1]

1949ع ۾ سندس خاندان ارجنٽائن لڏي ويو، جتي هن سان مارٽن هاءِ اسڪول ۾ تعليم حاصل ڪئي. 1954ع ۾ هن بيونس آئرس جي سرڪاري اطالوي هاءِ اسڪول ڪرسٽوفورو ڪولمبو ۾ داخلا ورتي ۽ 1960ع ۾ سائنسي ليسيم مڪمل ڪيو.

ننڍپڻ کان ئي کيس سائنس سان غيرمعمولي دلچسپي هئي. هو ايترو ته سائنس جو شوقين هو جو تلائن ۾ موجود ابتدائي جاندارن جي مطالعي لاءِ خوردبين خريد ڪرڻ خاطر پنهنجي سائيڪل به وڪڻي ڇڏي هئي.[2]

هن تورين يونيورسٽي جي تشريح الاعضا ۽ هسٽالاجي شعبي ۾ تربيت حاصل ڪئي ۽ جيورجيو گابيلا جي نگراني هيٺ محقق طور ڪم ڪيو. يونيورسٽي جي اخبار لاتينيو جو ايڊيٽر پڻ رهيو. جيتوڻيڪ هو تشريح الاعضا ۾ داخلا ورتل هو، پر هن فزيالاجي کي پڻ شامل ڪيو، حالانڪه يونيورسٽي هن گهڻ رخي طريقي جي مخالفت ڪندي هئي.[3]

هن 1967ع ۾ تورين يونيورسٽي مان طب ۽ جراحي جي ڊگري (Laurea in Medicina e Chirurgia، جيڪا ايم بي بي ايس جي برابر آهي) حاصل ڪئي. سندس ڊاڪٽري مقالو هاضمي واري نالي جي ايڊرينرجڪ اعصابي رسد جي عنوان سان هو، جنهن کي Dignita di Stampa (اشاعت جي لائق) قرار ڏنو ويو.[4]

طبي تحقيقي ڪيريئر

[سنواريو]

"اسان جا عصبي نظام اسان کي هر انهيءَ ڪم سان ڳنڍين ٿا جيڪو اسين ڪندا آهيون. اهي اسان جي سوچن، ثقافت، ذهني صلاحيت، احساسن ۽ جسماني ڪارڪردگين کي شڪل ڏين ٿا. منهنجي نظر ۾ سائنس جو ڪو به شعبو نيورولوجي کان وڌيڪ اهم نه آهي."

— مارسيلو ڪوسٽا، [2]

1967ع ۾ ڊگري حاصل ڪرڻ کان پوءِ ڪوسٽا طبي آفيسر طور لازمي فوجي خدمت مڪمل ڪئي ۽ پوءِ تورين يونيورسٽي ۾ ليڪچرار بڻيو. ايندڙ سال هو اٽلي ۾ ميڊيڪل رجسٽرار ۽ عام معالج طور ڪم ڪرڻ لڳو.

1970ع ۾ هو پنهنجي نئين شادي شده زال ڊينيئلا سان گڏ اٽلي مان آسٽريليا لڏي ويو. شروعات ۾ هن ميلبورن يونيورسٽي ۾ پروفيسر جيفري برن اسٽاڪ جي نگراني هيٺ حيوانيات ۾ پوسٽ ڊاڪٽورل فيلو طور ڪم ڪيو (1970ع–1973ع).

1973ع ۾ هن هيلسنڪي يونيورسٽي، فنلينڊ ۾ تحقيقي فيلو طور پڻ خدمتون سرانجام ڏنيون ۽ پوءِ وري تورين يونيورسٽي ۾ ڪم ڪيو.[1]

1975ع ۾ هو ٻيهر آسٽريليا موٽي آيو ۽ فلنڊرز يونيورسٽي ۾ انساني فزيالاجي جو ليڪچرار مقرر ٿيو. ان وقت نيوروسائنس هڪ نئون علمي شعبو هو، ۽ هو فلنڊرز ميڊيڪل اسڪول (هاڻي ڪاليج آف ميڊيسن اينڊ پبلڪ هيلٿ) ۾ هن شعبي جو باني ليڪچرار بڻيو.

1986ع ۾ فلنڊرز يونيورسٽي سندس خدمتن جي اعتراف طور نيوروفزيالاجي ۾ ذاتي چيئر قائم ڪئي. 2013ع ۾ کيس ميٿيو فلنڊرز امتيازي پروفيسر ۽ نيوروفزيالاجي جو پروفيسر مقرر ڪيو ويو.[1][2][5]

سندس تحقيق عصبي نظام تي مرڪوز هئي، خاص طور تي ان ڳالهه تي ته اهو آنڊن سان ڪيئن لاڳاپو رکي ٿو ۽ انهن کي ڪيئن سنڀالي ٿو. هن ان موضوع تي 250 کان وڌيڪ علمي مقالا گڏيل يا اڪيلي طور تحرير ڪيا.[1]

هن 72 جائزي وارا مقالا، ڪتابي باب ۽ چار ڪتاب پڻ لکيا.[4]

فلنڊرز يونيورسٽي جي بيان موجب هن آنڊن جي سرگرمي هلائڻ ۾ عصبي خلين جي ڪردار ۽ انساني عصبي نظام جي سوچ، ثقافت، ذهني صلاحيت، احساسن ۽ جسماني ڪارڪردگين تي اثر بابت ڪيترين بنيادي دريافتن ۾ اهم حصو ورتو.

ڇپيل ڪتاب

[سنواريو]
  • Brookes, Simon; Costa, Marcello, مرتب (2002). Innervation of the gastrointestinal tract: Volume 14 of Autonomic nervous system. Taylor & Francis. ISBN 9780415283779.
  • Burnstock, Geoffrey; Costa, Marcello (2013). Adrenergic neurons : their organization, function, and development in the peripheral nervous system. Chapman and Hall. ISBN 9781489972620.
  • Costa, Marcello; ۽ ٻيا (2013). Sensory nerves and neuropeptides in gastroenterology: from basic science to clinical perspectives. Springer Science & Business Media. ISBN 9781489907448.
  • Furness, John Barton; Costa, Marcello (2016). The Enteric Nervous System : 30 Years Later. Springer. ISBN 9783319275925.

حوالا

[سنواريو]
  1. 1 2 3 4 "Costa, Marcello – Biographical entry". www.eoas.info (برطانوي انگريزي ۾). Encyclopedia of Australian Science. 2011. 1 March 2018 تي حاصل ڪيل – The University of Melbourne eScholarship Research Centre وسيلي.
  2. 1 2 3 "Professor Marcello Costa" (آسٽريليائي انگريزي ۾). Flinders University – Engineering and Technology. 1 March 2018 تي حاصل ڪيل.
  3. ↑ Williamson, Susan (19 February 2014). "A neuroscientist's view". Australian Life Scientist (انگريزي ۾). 28 February 2019 تي حاصل ڪيل.
  4. 1 2 "Profile: Marcello Costa" (انگريزي ۾). The Conversation. 24 March 2011. 1 March 2018 تي حاصل ڪيل.
  5. ↑ "Professor Marcello Costa". www.flinders.edu.au (انگريزي ۾). Flinders University – Flinders Medical Centre. 1 March 2018 تي حاصل ڪيل.

ٻاهريان ڳنڍڻا

[سنواريو]
"https://sd.wikipedia.org/w/index.php?title=مارسيلو_ڪوسٽا&oldid=400595" تان ورتل